Sabibaripun Perang Pacina, Sang Nata Sunan Pakubuwana II sampun ngadhaton malih ing nagari Kartasura awit mengsah sampun kendhang. Parandene Sang Nata karaos oneng manggalih risakipun praja ingkang dipun osak-asik wadyabala Cina. Sang Nata lajeng ngutus Komandhan Hohendorff miwah patih Adipati Pringgalaya lan Adipati Sindureja kinen ngupadi papan kang sae kangge ngalih praja.
Wusnya naliti sawetawis papan Komandhan Hohendorff lan patih kekalih mrayogekaken praja ingalih maring dhusun Sala. Sampun kalampahan dhusun Sala dados nagari enggal, lajeng ingaran nagari Surakarta Adiningrat.
Ing Betawi, Tuwan Gurnadur Jenderal Baron van Imhoff sampun tampi palapuran prekawis kraton Jawi kang ingalih papan. Tuwan Gurnadur arsa martinjo ngiras pantes tuwi tanah jajahan Walandi kang risak awit Perang Pacina. Sampun kalampahan Tuwan Gurnadur tedhak ing Surakarta. Sang Nata mapag tedhakipun Tuwan Gurnadur kanthi pakurmatan ingkang salangkung ageng. Sang Nata ngajab tedhakipun Tuwan Gurnadur dados berkah tanah Jawi wimbuh-wimbuh makmur santosa.
Nanging pangajab wau tetela mleset. Tedhakipun Tuwan Gurnadur destun nyebar bibit-bibit wisuna. Tuwan Gurnadur minta dhateng Sang Nata anggadhuh tanah pasisir kanthi sewa ingkang sakalangkung sekedhik. Tuwan Gurnadur ugi minta Sang Nata supados ngelong sabin lenggahipun Pangeran Arya Mangkubumi saking 3000 cacah dados 1000 cacah. Kalih prekawis wau njalari Pangeran Arya Mangkubumi runtik ing galih, wasana lajeng tilar praja lan mandhireng ing tanah Sukawati.
Kadospundi babaring lelampahan ing bumi Jawa salajengipun