Apes temen nasibe Seta Aji. Lagi sesasi nikah karo Rani Pratiwi, Seta Aji kepeksa ninggal bojone mau dadi randha. Seta Aji tiwas nalika ana lindhu gedhe ing tlatah Klaten taun 2006. Nanging sadurunge tilar donya Seta Aji kober nitip layang wasiat marang Sri Sadana, sedulur angkate. Nadyan mangkono Sri Sadana bingung anggone arep masrahake badha tinggalane Seta Aji marang tilas bojone. Awit babarpisan durung nate srawung lan uga durung mangerteni ing ngendi papan dununge.
Amung kanthi pawitan informasi kang minim, Sri Sadana mider saindenging kabupaten Bantul saperlu nggoleki randhane Seta Aji. Nanging bebasan nganti tepung gelang anggone mecaki tanah Bantul, Sri Sadana gagal nemokake Rani Pratiwi.
Ing papan liya, Rani Pratiwi uga nandhang pacoban kang abot. Ibu lan adhike ontang-anting tiwas nalika prastawa lindu kasebut. Ing kahanan mbobot enom, Rani Pratiwi tansah nunggu tekane Seta Aji, nanging kang dienteni ora nate teka. Nganti anake lair. Rani yakin menawa bojone uga tiwas ing prastawa lindhu mau. Tekade dheweke arep urip mandhiri nggedhekake jabang bayi tinggalane bojone. Nanging nalika ganep sewu dina saka prastawa lindhu gedhe, Rani tansah ngangen-angen marang bojone. Tuwuh krenteg atine kanggo nglari ing ngendi papan bojone dikubur. Supaya besok menawa anake ngancik dhiwasa bisa nuduhake marang anake kuburane bapake.
Apa tekade Rani bakal kasil? Lan kepiye nasibe Sri Sadana kang katitipan bandhane bocah yatim kang akeh cacahe? Sumangga disimak ing novel karyane Suryadi Ws, KINOSEK ING LINDHU.